خزانات الزجاج المصهور على الصلب (GLS) بقت الاختيار الأول لتخزين المياه والصرف بأحجام كبيرة في مشاريع كتير في مصر والمنطقة. في المقال ده هنشرح هي إيه، وإمتى تبقى الحل الصح، وإيه الفرق بين تركيب سليم وتركيب هيعمل مشاكل بعدين.
يعني إيه خزان GLS؟
خزان GLS بيتكوّن من ألواح صلب متغطية من الوشين بطبقة زجاج مصهورة على الصلب في درجة حرارة عالية. الزجاج بيدي مقاومة للصدأ وسطح ناعم وصحي، والصلب بيدي المتانة. الألواح بتتربط ببعض بالمسامير في الموقع مع مادة عزل (Sealant) عند كل وصلة، فوق قاعدة خرسانية.
مناسبة لإيه؟
- خزانات مياه الشرب للمدن والمصانع والكمبوندات
- خزانات مياه الحريق
- المياه الخام والمعالجة في محطات معالجة المياه
- الصرف الصناعي والصحي (خزانات موازنة وحمأة وهاضمات)
مقارنةً بالخزان الخرساني، خزان GLS بيتركب أسرع بكتير، مش محتاج وقت معالجة، وممكن يتفك ويتنقل. ومقارنةً بخزان الصلب الملحوم في الموقع، مش محتاج دهانات في الموقع وعمره الافتراضي من غير صيانة أطول بكتير.
التركيب الصح شكله إيه
أغلب خزانات GLS بتتركب من فوق لتحت باستخدام نظام جاكات رفع: السقف والحلقة العليا بيتجمعوا على الأرض، وبعدين بيترفعوا وكل حلقة تحتها بتتربط من تحت. كده الفريق بيشتغل على مستوى الأرض ومن غير أوناش تقيلة. النقط الحرجة: استواء القاعدة، طريقة التعامل مع الألواح (أي خدش في الطلاء هيبقى نقطة صدأ بعدين)، وضع الـ Sealant صح في كل وصلة، عزم ربط المسامير، واختبار الامتلاء (Hydrostatic Test) قبل التسليم.
في مؤسسة الصفا ركّبنا خزانين GLS سعة حوالي 1,400 م³ للخزان وبارتفاع 16 متر لمحطة معالجة المياه في مصنع لوسافر مصر بالنوبارية الجديدة، بالتعاون مع Veolia Water Technologies، مع خطة فحص واختبار كاملة لكل مرحلة.
توريد وتركيب وفحص وإصلاح
بنورّد خزانات GLS من خلال توكيلاتنا مع المصنعين، وبنركّب أي خزان مهما كان المصنّع. وكمان بنفحص ونصلّح الخزانات القائمة: ألواح متضررة، وصلات بتسرّب، وصدأ حوالين الفتحات. ولأننا بنصنّع جاكات الرفع بنفسنا، بنقدر نتحرك بسرعة من غير ما نستنى معدات.
شوف خدمة خزانات المياه المجمعة أو ابعتلنا سعة الخزان وموقع المشروع ونرد عليك بعرض فني.